Te Hoahoa 

I hoahoatia ngā pātai tuihono Tatauranga 2023 mō ngā tūhononga ā-iwi me te whakapapa Māori i te mahi tahi i waenganui i Te Kāhui Raraunga (TKR) i raro i tō mātou whakaaetanga Whanaungatanga Mana Ōrite me Tatauranga Aotearoa.  

 

Nā te hoahoa anō i te pātai tuihono tūhononga ā-iwi i kounga ake ngā raraunga mā ngā iwi.  

 

Ko ngā panonitanga pātai tūhononga ā-iwi: 

• He whakarahi ake i ngā kōwhiringa iwi hei tīpakohanga, mai i te 5 ki te 16, me te whakapai ake i te whakatakoto kia māmā ake te tāpiri iwi anō. Nā konā i āwhina kia nui ake ngā tūhononga whakapapa hei tautohu.  

• He tāpiri mahere hei tīpako rohe, kātahi ko te tūhononga ā-iwi, ngā tūhononga ā-iwi rānei mai i tētahi rārangi iwi kei taua rohe. Nā konā i pai ake te āheinga o te tangata ki te tautohu i tōna/ōna iwi.   

• He āheinga kia tohipangia te mahere, ka tīpako kē i te iwi mai i tētahi rārangi e taea ana te tātari kia hāngai ki tēnā ki tēnā rohe. Nā konā i kounga ake ngā raraunga i te wā tukatuka.   

• He whakapiki ake i te taurangi tūhononga ā-iwi mai i te kaupapa tōmua 2 ki te kaupapa tōmua 1. Nā konā i nui ake ai te tuari i ngā rauemi me ngā pūkenga ki te taurangi i tōna hurihanga, arā, mai i te hoahoa pātai ki te whakaputanga o ngā raraunga. Nā konā i kounga ake ngā raraunga mā ngā iwi.  

 

Tuia ki tēnā, nā runga i tō mātou tūranga i te Poari Hōtaka Tatauranga 2023, i taunaki mātou kia wawe te whakaputa i ngā raraunga tūhononga ā-iwi i ērā i puta i ngā Tatauranga o mua, kia roa ake te whai wāhitanga o ngā iwi ki ngā raraunga.   

​

Te Kohikohi Raraunga 

Kua hoahoatia te Tatauranga 2023 mā te whakamahi i tētahi tauira whakahanumi. Ko te tikanga o tēnei, ka whakahanumihia ngā raraunga kua kohia mā ngā urupare tatauranga (ngā puka tatauranga takitahi, whare hoki i oti te whakakī) ki ngā raraunga mai i ngā puna raraunga kē mehemea karekau he urupare puka tatauranga.

​

Ko ētahi o ngā puna raraunga kē ko ngā raraunga whakahaere me ngā raraunga nō ngā tatauranga o mua. Ko ngā raraunga whakahaere ka kohia e  ngā tari kāwanatanga, e ētahi atu rōpū rānei, hei tauira, ko ngā mauhanga whānautanga, matenga, tāke hoki. 

 

He kōrero anō mō te tauira whakahanumi kei te paetukutuku Tatauranga Aotearoa.  

​

Te whai māramatanga ki ngā raraunga mā tō iwi 

E āhei ana te titiro ki ngā māramatanga mā tō iwi ki Te Whata mai i te Tāite te 26 o Hepetema 2024.  

 

Ka āhei ngā Kaiwhakahaere Mōhiohio ā-Iwi me ngā mema o ngā iwi kei a rātou te mana pānui-anake ki te whārangi tūmataiti o tō rātou iwi, ka āhei rātou te tikiake i ngā tūtohi raraunga ā-iwi taketake utukore i Te Whata ā te 26 o Hepetema 2024. 

 

I tō whārangi iwi, ka āhei te kite atu i te taupori tūhononga ā-iwi me te wāhi e noho ai ngā tāngata o tō iwi ki Aotearoa ki tēnā ki tēnā rohe. Kia mōhio mai, ko te hunga ka tūhono ki tō iwi, ka tūhono hoki pea ki ētahi atu iwi puta i te motu. 

 

Ko te pikinga ōrau o tō iwi he mea whakatairite ki ngā raraunga o te Tatauranga 2023. He torutoru ngā take i pērā ai. Tuia ki te pikinga taupori me te hekenga mai, nā ngā whakapaitanga ki te hoahoa uiui me ngā tukanga kohi raraunga i hua mai ai ēnei pikinga.    

 

Kei te āhua o te rahi o tō iwi, ka kitea pea ētahi kaupapa, ētahi taurangi e pā ana ki ngā raraunga takitahi, raraunga whare e pā ana ki ngā tūhononga ā-iwi, te whakapapa Māori hoki. Tae atu pea ki ngā māramatanga mō te reo kōrero, te rangatiratanga whare, ngā tohu mātauranga rānei.  

 

Ko te rahi o ngā urupare Tatauranga 2023 ka kohia i ngā tāngata o tō iwi, koia hoki te rahi o ngā raraunga hei tātari. Ka whakamahia ērā hei tautohu i ngā tauira me ngā whanaungatanga kei roto i ngā raraunga. Ka whakairihia ēnei ki Te Whata hei māramatanga mā tō iwi. 

 

Mehemea he Kaiwhakahaere Mōhiohio ā-Iwi koe, ā, kāore anō koe kia tūhono ki Te Whata, tēnā tuku īmēra atu ki tewhata@kahuiraraunga.io. Pānuihia he kōrero anō mō ngā Raraunga ā-Iwi me ngā Kaiwhakahaere Mōhiohio ā-Iwi ki Te Whata.