30 Oct 2024
Mō te wā tuatahi kua whakaputaina ngā raraunga whānau Māori, kāinga hoki hei tauanga Tatauranga ōkawa.
Mō te wā tuatahi kua whakaputaina ngā raraunga whānau Māori, kāinga hoki hei tauanga Tatauranga ōkawa.
Ko ēnei raraunga he wāhanga o tētahi huinga tauanga ka huraina ki Te Whata i tēnei rā, tae atu ki ngā raraunga tūhononga ā-iwi mō ngā whānau me ngā kāinga.
Hei tā Kirikowhai Mikaere, Māwhitiwhiti Matua mō te Data ILG me Te Kāhui Raraunga, mā ēnei huinga raraunga e whakamana i te āheinga o ngā iwi Māori ki te whakamahere mō ngā matea whare anamata o ō rātou tōpūtanga.
“Mai i tēnei rā, kei ngā iwi Māori ngā raraunga o nāianei, raraunga kounga hoki mō te āhua o te noho o ōna mema, tae atu ki ngā taipitopito mō te hunga noho kāinga, te whiwhinga moni, ā, mehemea rānei ka whai wāhi ngā mema ki ngā āhuatanga me mātua whai kia ora ai, pērā i te wai inu ora me te hiko,” tā Mikaere.
“Mai i ngā raraunga kua whakaputaina i tēnei rā, e mōhio nei tātou ko te nuinga o ngā whānau Māori e noho ana ki ngā kāinga he kotahi te whānau, ā, i te 2023 he 86.9% o ō tātou whānau he tokorua ki te tokowhā ngā mema whānau.
“He nui kē atu ēnei tauanga i ngā nama i te pepa - mā ēnei tauanga e kitea ai ngā māramatanga whai tikanga mō ngā whakaritenga whare o tō tātou iwi, ka mutu, he whakamana hoki i te whanaketanga o ngā whare whaitake mō te anamata ā haere ake nei.”
Ko tēnei whakaputanga te putanga tauanga whānau, tauanga kāinga tuatahi kua puta i te Tatauranga 2023, kotahi wiki i mua tonu i te putanga o ngā māramatanga taupori katoa i puta i a Tatauranga Aotearoa.
Hei tā Te Aho Here o Te Kāhui Raraunga, hei tā Rāhui Papa, ko te tuku i ngā raraunga iwi Māori ki ngā ringaringa o te iwi Māori i te tuatahi, koia ko tētahi wāhanga nui o te mana urungi raraunga pai.
“Ko ngā raraunga Māori, he taonga tuku iho. Me āta poipoi hei painga mō ngā iwi, ngā hapū, ngā whānau Māori hoki,” tā Papa.
“Mā te tuku i ngā raraunga iwi Māori ki ngā ringaringa o te iwi Māori, mā konā e wete ai ngā taupā kia whai wāhi atu ki ō tātou raraunga, ā, mā konā hoki e hua mai ai he tirohanga Māori ki ngā māramatanga raraunga ka hura.
“Mā ēnei raraunga kua whakaputaina i tēnei rā e whakamana i te iwi Māori ki te whakamahere mō te tōnuitanga. Ko te ora o te whānau, ka tīmata i te kāinga - mai i ā tātou pēpi tae noa ki ō tātou kaumātua.”
E wātea ana ngā raraunga Tatauranga o tēnei rā – tuia hoki ki ngā raraunga i whakaputaina i tēnei tau – ki Te Whata, he pae raraunga iwi nā te ringa mahi o Data Iwi Leaders Group, nā Te Kāhui Raraunga i waihanga.
Ko ngā māramatanga Te Whata ka hua mai i te tātaritanga o ngā raraunga e ngā kaitātari raraunga Māori matatau, mā konā e tika ai te whakaatu i ngā māramatanga kia whaitake, kia whai tikanga ki te iwi Māori.
Tuia ki ngā māramatanga hou mō te whakapapa Māori me ngā tūhononga ā-iwi kei Te Whata, e āhei ana a wai ake rānei ki te tikiake i ngā pukamahi whānau Māori, kāinga hoki mai i te paemana All Māori.
E wātea ana hoki ki ngā iwi me ngā rōpū ā-iwi te āheinga ki te tono raraunga hāngai mō ngā whānau, whānau whānui, kāinga hoki mā Te Ara Takatū o Tatauranga Aotearoa.
